"சும்மா நன்றி சொல்லிட்டு போக மாட்டேன்!" – விஜயின் உணர்ச்சிபூர்வ பேச்சு சர்ச்சையில்; ரஜினியை அட்டாக் செய்தாரா?

சினிமா நடிகர்கள் பெரும்பாலும் ஒரு தனி உலகத்தில் வாழ்வதாகவே கருதப்படுகின்றனர். ஆடம்பரமான வாழ்க்கை, சிறப்பு பாதுகாப்புகள், கருப்பு நிழலில் மறைந்து கொள்ளும் கார்கள், பொது நிகழ்வுகளில் கலந்து கொள்ளாமல் இருப்பது போன்றவை இவர்களின் பொதுவான பண்பாடு. சில நடிகர்கள் "என்னை வாழ வைத்த மக்களுக்காக ஏதாவது செய்வேன்" என்று மேடைகளில் பேசினாலும், நடைமுறையில் அதற்கான நடவடிக்கைகள் சில சமயங்களில் காணாமல் போவது தமிழ் சினிமா உலகில் பரவலான உண்மை.

இந்த சூழலில், நடிகர் விஜய் நேற்று நடைபெற்ற "ஜனநாயகன்" இசை வெளியீட்டு விழாவில் ஆற்றிய உரை, தமிழகம் முழுவதும் பேசுபொருளாக மாறியுள்ளது. “என் 33 ஆண்டு சினிமா வாழ்க்கையில் எனக்கு ஆதரவாக நின்றவர்கள் என் ரசிகர்கள். அடுத்த 33 ஆண்டுகள் அவர்களுக்காக நான் நிற்பேன். எனக்காக அவர்கள் தியேட்டரில் நின்றார்கள்; இனி அவர்களுக்காக நான் அவர்கள் வீடுகளுக்குள் நுழைந்து நிற்பேன். எனக்காக அவர்கள் எல்லாவற்றையும் விட்டுக் கொடுத்தார்கள்; அதற்காக நான் இந்த சினிமாவையே விட்டுக் கொடுக்கிறேன். நான் சும்மா ‘நன்றி’ சொல்லிவிட்டு போக மாட்டேன்; நன்றிக்கடனை தீர்த்து விட்டுதான் போவேன்” – என உணர்ச்சியுடன் பேசியுள்ளார்.

இந்த பேச்சு, தன்னை சினிமாவில் உயர்த்திய ரசிகர்களுக்கு அரசியல் மூலம் பதிலளிக்கப் போவதாக விஜய் குறிப்பிட்டதாக பொருள்படுகிறது. இது சமூக ஊடகங்களில் வெகுவாக பகிரப்பட்டு, பலர் இது மறைமுகமாக நடிகர் ரஜினிகாந்தை சுட்டிக்காட்டுவதாக கருதுகின்றனர். ஏனெனில், ரஜினிகாந்து "என்னை வாழவைத்த தெய்வங்கள் தமிழக மக்கள்" என மேடைகளில் உணர்ச்சிபூர்வமாக பேசுவது வழக்கம். மேலும், படங்களில் மக்களுக்காக பாடினாலும், நிஜ வாழ்க்கையில் அவர் அரசியலில் ஈடுபடாமல் விலகியது பலருக்கும் தெரிந்த விஷயம்.

இதனால், விஜயின் இந்த பேச்சு ரஜினியின் நிலைப்பாட்டை மறைமுகமாக விமர்சிக்கும் வகையில் அமைந்ததாக சிலர் கருதுகின்றனர். ஆனால், சிலர் இது பொதுவான ஒரு கருத்துதான்; ரஜினி மீது குறிப்பிட்ட நோக்கம் இல்லாமல் இருந்தாலும், அது அவர் மீது பொருந்துவதாக இருக்கிறது என்று பதிவு செய்துள்ளனர். இந்த விவாதம் தற்போது இணைய உலகிலும், சினிமா ரசிகர் சமூகத்திலும் வலுவாக நடைபெற்று வருகிறது.